Ekstradohet Imami, krijoi sekt radikal

Shkak është bërë aktiviteti i Imamit nga Elbasani, Kastriot Duka, i njohur me emrin Xhemal,,,,,,,,,,

Komuniteti Mysliman në Kosovë prej disa ditësh është përfshirë në një ngjarje të rëndë, e cila ka rrezikuar rëndë bashkëjetesën mes tyre dhe njëkohësisht ka cenuar besimin te feja islame.

Shkak është bërë aktiviteti i Imamit nga Elbasani, Kastriot Duka, i njohur me emrin Xhemal, i cili njihej si Imami i Marinës së komunës së Skënderaj në Kosovë.

Duka u arrestua dje nga policia e Kosovës në akuzën e shkeljes së legjislacionit në fuqi, si dhe në disa raste ka cenuar rendin publik dhe kushtetues të Kosovës.

Historia

Gjithçka nisi nga një peticion i firmosur prej 6 mijë qytetarësh të komunës së Skënderaj ku kryente aktivitetin e tij fetar Imami Kastriot Duka.

Peticioni ishte firmosur dhe nga disa besimtarë myslimanë.

Në peticion kërkohej që të mbyllej përkohësisht xhamia e Marinës, e cila drejtohej nga Duka.

Nga pretendimet e firmëtarëve thuhej se xhamia në Marinë ishte e vetmja në Kosovë që nuk ishte nën juridiksionin e Bashkësisë Islame, ndaj pretendohet se Kastriot (Xhemal) Duka ushtroi funksionin e Imamit pa bekimin e Bashkësisë.

Akuza

Imami nga Elbasani akuzohet jo vetëm nga autoritetet kosovare, por ndaj tij ka akuza dhe nga vetë komuniteti mysliman në komunën ku ai ushtroi aktivitetin.

Nismëtarët e peticionit e cilësojnë alarmante situatën në Marinë, vendin ku Imami qëndroi për disa kohë në Kosovë.

Disa myslimanë shprehen se respektojnë fenë dhe mënyrën tradicionale, siç ka qenë përpara, por duket se në këto kohë po kultivohet një kulturë iraniane a irakiane, e cila po e çon besimin islam në Kosovë drejt një ekstremizmi, radikalizmi të fesë, gjë që çon te fondamentalizmi islamik.

Kundërakuza

Brenda komunitetit mysliman ka dhe zëra kundër këtyre akuzave.

Rreth 100 vetë u mblodhën dje në Skënderaj, në shenjë proteste ndaj mbylljes së përkohshme të xhamisë në fshatin Marinë.

Policia e Kosovës tha se në protestën që ka zgjatur rreth 30 minuta, kanë marrë pjesë rreth 100 persona dhe se protesta ka përfunduar e qetë.

Policia

Në një komunikatë për media, të lëshuar nga Ministria e Punëve të Brendshme e Kosovës, thuhet se Dukës i është ndërprerë qëndrimi i përkohshëm në territorin e Republikës së Kosovës, pasi që ai ka shkelur legjislacionin në fuqi, si dhe në disa raste ka cenuar rendin publik dhe kushtetues të Kosovës.

"Elementet inkriminuese të vërtetuara edhe me paraqitjet publike të zotit Duka, flasin për një ndërrim të arsyes dhe qëllimit, për të cilin edhe i është dhënë lejeqëndrimi në territorin e Republikës së Kosovës",- thuhet në komunikatë, për të shtuar se "zoti Duka, së fundmi, me vendim të plotfuqishëm të gjykatës kompetente, ka qenë i shpallur fajtor për shkelje të legjislacionit në drejtim të qëndrimit të paligjshëm në Republikën e Kosovës".

Sipas komunikatës së ministrisë, ekzistojnë arsye të besueshme dhe të vërtetuara edhe nga vetë zoti Duka në paraqitjet e tij publike, se qëllimi primar për të cilin ka kërkuar të qëndrojë në Republikën e Kosovës, është ndryshuar dhe ka orientim krejtësisht tjetër.

"Leje qëndrimi është lëshuar për zhvillimin e aktiviteteve humanitare, e jo të aktiviteteve të tjera, të cilat zoti Duka i ka ushtruar në territorin e Republikës së Kosovës",- thuhet në komunikatën e MPB-së.

Nisur nga këto fakte dhe në bazë të këtij vendimi, Policia e Kosovës, dje, më datën 4 mars 2010, ka arrestuar dhe deportuar në shtetin amë z. Kastriot Duka. Të njëjtit i ndalohet hyrja në territorin e Republikës së Kosovës, bazuar në dispozitat ligjore në fuqi (Ligji për të huaj)", sqarohet në komunikatën e MPB-së.

I akuzuari

Kastriot Duka nga Elbasani, që tashmë ka ndryshuar emrin në Xhemajl, një ditë para se të mbyllej xhamia, në njërën nga dhomat e saj të shndërruar në zyrë, hodhi poshtë akuzat.

Ai, madje, akuzoi iniciatorët e peticionit, se kanë mbledhur nënshkrime të rreme.

"Ka marrë nënshkrime të rreme, ka manipuluar në emër të Albin Kurtit.

Ky nuk është vendim i drejtë, sepse shteti është i ndarë nga xhamia.

Ne kemi Bashkësinë Islame në Kosovë, e cila ka të drejtë dhe kompetencë ta mbyllë xhaminë kur ka baza.

Por, megjithatë, ne jemi në negociata me Bashkësinë Islame dhe shumë shpejt do ta zgjidhim problemin e xhamisë së Marinës", tha Duka.

Duka thotë se përmes organizatës së tij, "Rahma/Mercy", ndihmon 550 familje në Drenicë me nga 20 euro në muaj.

Në Marinë, shumica e banorëve kanë familjarë të vrarë në luftë.

Ata thonë se shoqata "Ramha/Mercy", me seli në Angli, vazhdimisht u ka ndihmuar në ushqime, por edhe në të holla.

Por, sipas aktivistëve për të drejtat e njeriut, ndihmat zakonisht janë kushtëzuar me lojalitetin e treguar ndaj z.Duka, që nënkupton dërgimin e fëmijëve në xhami për mësime kuranore, e në këtë rast edhe mbulimin e vajzave të vogla.

Në internet, madje, qarkullon një video, ku Duka mbulon vajzat 6 - 7-vjeçare.

Vetë z.Duka pranoi se vajzat janë mbuluar, por tha se kanë pasur

pëlqimin e prindërve.

Add to: del.icio.us | Digg