Archives for March 29, 2019

Blog-Alias: Jozef Shvjek

Ditët e fundit kazani mediatik ka arritur një pikë të re vlimi pas historisë me agjentë rusë të infiltruar dhe me lidhje të dukshme apo padukshme të lidershipit të PD në Shqipëri me demonin e kudondodhur rus. E gjithë kjo vëmendje në crescendo vjen pasi materialet e shpërndara në media përmbushin pritshmëritë e qeverisë së Edi Ramës për një ndryshim të vëmendjes së publikut. Sigurisht, kjo skemë e pastër është pjesë e kundërfensivës Rama ndaj atij që duket si një kundërshti e gjerë dhe në rritje popullore ndaj qeverisjes së tij.

Detajimet e kësaj çështjeje që nisin me një shkrim të gazetarit Besar Likmeta, dhe që kulmojnë me një shkrim të portalit të majtë amerikan Mother Jones disa muaj më pas po shndërrohen sot në shtizën perfekte që “çunat e Sorosit” i kanë vënë në dispozicion Edi Ramës (apo anasjellas?).

Historia është kjo: Në vitin 2017 PD nënkontraktoi të paktën një kompani për lobim në SHBA (të njëjtën gjë bëri PS dhe LSI). Kompani zotërohej nga Nick Muzin, një republikan i njohur dhe ish shefi i fushatës së Ted Cruz më vonë anëtar i shtabit të fushatës së Presidentit Trump.

1. Ndarja e detyrave!

Disa muaj pas mbarimit të zgjedhjeve në Shqipëri, gazetari Likmeta përmes të dhënave që gjenden fare lehtë online mbi raportet e kompanive të lobimit në SHBA, zbuloi se kompania e nënkontraktuar nga PD në zotërim të Nick Muzin kishte ndryshuar deklarimin. Në deklaratën e re të postuar online, më 22 nëntor 2017, portali superinvestigativ Reporter.al “zbuloi” se sipas Muzin PD nuk ka paguar më 25 mijë USD, por plot 675 mijë USD.

Sipas letrave të publikuara, kompania e Muzin kishte marrë një pagesë tjetër nga kompania Biniata Trade, e regjistruar në Skoci në trajtën e një kompanie offshore. Kjo kompani, sipas deklarimit të ri të Muzin, kishte kontribuar me dy pagesa (150 mijë USD dhe 500 mijë USD).

Akuza kryesore që ngrihet (përtej pompozitetit të një kompanie tjetër që është përdorur) është se PD nuk ka deklaruar shumën e mbi 500 mijë USD të paguar për lobim në KQZ.

Disa muaj pas këtij shkrimi, portali ultra i majtë Mother Jones (mars 2018), botonte një tjetër shkrim me këtë temë (lidhja mes Mother Jones dhe Reporter.al është evidente). Shkrimi argumentonte me indicie të tjera investigimin e saj për kompaninë skoceze Biniata Trade. Mother Jones argumentonte se sipas indicieve të saj kjo kompani zotërohej nga disa rusë (Evgeny Sheremetyev dhe Kostandin Ferulev) të cilët kishin krijuar kompaninë offshore në Skoci ku janë paguar Nick Muzin për llogari të PD.

Akuza kryesore e Mother Jones është se Lulzim Basha, lideri i Partisë Demokratike të Shqipërisë, ishte kanali përmes të cilit Vladimir Putin dërgonte para për të ndërhyrë në zgjedhjet e SHBA. Mother Jones e nënvizon këtë fakt disa herë me radhë ndërsa sjell në vëmendje të publikut disa indicie që vështirë se vërtetohen ose rrëzohen, pra indicie të pambështetura në fakte konkrete. Jo vetëm kaq, por portretizimi i Ramës si një lider vizionar perëndimor dukshëm e kthen në problematik shkrimin investigativ të Mother Jones.

Në fund të shkrimit, gazetarët e “Nënës Xhons” nënvizojnë edhe një herë çështjen kyçe.

Sipas tyre, çështja tanimë është e qartë se “kush i ka sponsorizuar përpjekjet e Muzin për të ndihmuar PD-në” Evidencat sugjerojnë një skenar turbullues; një lidhje klandestine me Rusinë që ka turbulluar Washingtonin në mënyrë që të ndiqet një agjendë e mbuluar në Shqipëri.” Më tej gazetarët shkruajnë se Mueller ka nisur fletë arrestet për 13 agjentë rusë ndërkohë që hetimet po thellohen për të shkruar deri tek njerëzit më pranë Trump që kanë lidhje me Rusinë dhe bashkëpunimin e tyre me Rusinë. Në fund gazetarët e shkrimit argumentojnë “Ky bashkëpunim Biniatta Trade-Shqipëri është një sinjal paralajmërues se lufta e fshehtë politike e Rusisë mund të shkojë më thellë” duke aluduar se Putin ka përdorur vetë Lulzim Bashën për të ndërhyrë direkt në zgjedhjet presidenciale në SHBA.

Duhet pasur parasysh se shkrimi i Mother Jones është shkruar në kulmin e sulmeve dhe konspiracioneve të ngritura ndaj Presidentit Trump. Ky shkrim, siç gjithsekush mund ta lexojë me vëmendje, ngrihet mbi akuzën se Trump dhe njerëzit pranë tij kanë bashkëpunuar me rusët. Sipas akuzave, Nick Muzin (gjithashtu njeri i Trump) ka bashkëpunuar me rusët dhe bashkëpunim faktohet nga kompania Biniata Trade që është e lidhur me dy rusë (sipas shkrimit të Mother Jones).

Qartësisht Mother Jones dhe Reporter.al ndonëse ngrenë akuza ndaj të njëjtit njeri (apo parti), kanë dy pretendime të ndryshme. E para pretendon që FBI po heton një lidhje ruse Muzin-Basha-Putin ndërsa e dyta, pretendon që Basha ka thyer ligjin zgjedhor duke mos deklaruar 650 mijë USD. Kjo e fundit është në fakt edhe ajo çka heton prokuroria e Shqipërisë sot. Ndërsa media, natyrisht e ndihmuar (jo)vullnetarisht nga të dyja mediat e mësipërme, po përzien çështjet nën frymën e dezinformimit publik.

2. Idet e Marsit

Një vit më pas, në prokurorinë e Tiranës rihapet çështja e lobimit për PD-në. Lulzim Basha shkon në prokurori dhe jep përgjigje për pyetjet e tij, në media ai shprehet se “Prokuroria duhet të nxjerrë çfarë FBI ka sjellë”.

Gjithashtu një vit më pas hetimi i Robert Mueller (Prokurorit special për ndërhyrjet ruse në zgjedhjet në SHBA dhe hetimin e Donald Trump) dorëzon raportin tek Prokurori i Përgjithshëm William Barr. Ky informon kongresin në një letër të gjatë katër faqe, nga ku dilet në dy konkluzione që kanë lidhje me temën tonë; a) Stafi i Donald Trump nuk ka bashkëpunuar me rusët, dhe Donald Trump nuk ka bashkëpunuar me rusët. b) Nuk ka prova që Donald Trump ka penguar drejtësinë në hetimin ndaj tij për këtë çështje.

Shkurt dhe qartë, Nick Muzin (pjesëtar i stafit të Trump) nuk ka bashkëpunuar me rusët gjatë fushatës elektorale apo pas saj.

Gjithsesi në Shqipëri është ngritur një zallamahi. Çështja e rusëve në SHBA (pra çështja e Mother Jones) dhe ajo e hetimit të Prokurorisë së Tiranës për fondet e padeklaruara të PD janë përzier bashkë. Kjo përzierje të kujton çështjen e Gërdecit, ku Berisha junior u përzie me trafikun e armëve të Diverolit, çështje që për ironi të fatit mori drejtim përpara një jave. Duke zbuluar një tjetër dezinformim medaitik të drejtuar dhe krijuar prej të njëjtëve njerëz.

Nga ana tjetër, gjatë gjithë hetimit të tij, prokurori Mueller ka bërë publike të gjitha fletë-arrestet apo dëgjesat në lidhje me çështjen e tij. Tanimë përveç të arrestuarve (për çështje të tjera dhe jo lidhje me Rusinë) janë bërë publike dhe 13 emrat e të huajve që kërkohen në SHBA në lidhje me hetimin për ndërhyrjen në zgjedhjet e SHBA nga Rusët.

Kjo do të thotë që nëse emri i asnjë funksionari të lartë të PD nuk është i shkruar aty, atëherë askush nga PD nuk po hetohet nga FBI për këtë çështje.

A ka lidhje Basha me rusët dhe a po heton FBI lidhjen në fjalë? Duke qenë se në Shqipëri institucioni i Prokurorisë funksionon hera herës si një organizëm okult, na duhet të hedhim sytë diku më larg.

Përzierja e çështjeve duket se po krijon frynën e përgjithshme që Lulzim Basha realisht është një njeri i rusëve. Ajo çfarë vlen të theksohet gjithsesi është se Nick Muzin, njeriu i akuzuar që ka marrë paratë ruse nga Mother Jones, sot e kësaj dite është i lirë dhe drejton një kompani tjetër lobimi. Në faqen zyrtare të kompanisë së re të Muzin vërehet se ai e konsideron arritje foton mes Bashës dhe Donald Trump, që ai e ka mundësuar. Për këtë foto, Mother Jones dhe Reporter.al, ngrenë aludimin se Basha ka paguar para nga rusët.

Po në Tiranë?

Akuza e Prokurorisë së Tiranës është se kryetari i PD Lulzim Basha nuk ka deklaruar pagesat që ka kryer në SHBA, ndërkohë që ai e mohon se ka kryer këtë pagesë. Por, në këtë mes nuk ka as rusë dhe as Putin.

Marsi është një muaj interesant. Sheksprisi shkruan se Çezari u vra në Idet e Marsit, ndërsa ndodhitë e fundit dëshmuan një dështim spektakolar të të gjitha mediave që ngritën konspiracionin Trump-Putin. Duket se gazetaria shqiptare, e cila ka ves autocensurën dhe të cilës i mungon virtyti i përgjegjshmërisë, nuk i ka nxjerrë akoma mësimet e saj. Por, e me gjasë këtu është problemi i disave. Ne presim përgjegjshmëri nga gazetarë dhe media që qartazi kanë të shkruar në ballë parrullën e nënës parti.

Uashingtoni shkallmon qeverinë Rama, e shpall më të korruptuarën në Evropë dhe i hedh poshtë propagandën mafioze, sipas DASH qeveria nuk merret më me hashashin, por vetëm me drogërat e forta. A do ta shpallë Rama kazan edhe DASH?

Shtetet e Bashkuara të Amerikës kanë dalë në konkluzionin se qeveria e Edi Ramës është e korruptuar në çdo nivel, duke iu dhënë një mesazh të qartë shqiptarëve se nuk po qeverisen, por po plaçkiten nga një bandë me tipare mafioze dhe të korruptuar deri në palcë. Departamenti Amerikan i Shtetit në raportin e radhës për Shqipërinë ka konfirmuar atë që ‘Pamfleti’ ka denoncuar prej muajsh, se Edi Rama drejton qeverinë më të korruptuar që ka pasur ndonjëherë Shqipëria. Nga 250 milionë euro që vidheshin mesatarisht në vit, qeveria e Edi Ramës e ka çuar këtë shifër vjedhjeje në 1.7 miliardë euro në vit. Së dyti, në raport thuhet se kokat e trafiqeve, që kanë kapur qeverinë e krimbur nga korrupsioni, nuk merren më më hashash, por me drogërat e forta.Departamenti Amerikan i Shtetit thotë se nga kapja e qeverisë nga korrupsioni, po bëjnë festë kokat e trafikut të drogës. Në raportin e DASH thuhet se korrupsioni në të gjitha nivelet e qeverisjes e kufizon efektivitetin e përgjithshëm të luftës kundër narkotikëve. Korrupsioni zyrtar, thuhet aty, është i përhapur dhe nxit një mjedis në të cilin trafikantët e drogës janë mjaft të aftë të veprojnë pa u ndëshkuar. Raporti thotë se shkalla e lartë e papunësisë dhe sundimi i dobët i ligjit kanë krijuar një ambient ideal për grupet e krimit të organizuar që shkaktojnë problemin e kontrollit të drogës në Shqipëri. Mbetet për t’u parë nëse Edi Rama do ta shpallë kazan edhe Departamentit Amerikan të Shtetit.Sipas raportit të Departamentit Amerikan të Shtetit roli i Shqipërisë si burim apo treg për droga të paligjshme përtej kanabisit është i vogël, por ka pasur një rritje në konfiskimet e kokainës që kalon nëpër Shqipëri për në Evropë, përveç zbulimit të laboratorëve të përpunimit të heroinës dhe kokainës në Shqipërinë veriore dhe qendrore. “Grupet kriminale shqiptare e trafikojnë kokainën dhe heroinën drejt tregjeve evropiane nga vendet burimore në Amerikën e Jugut dhe Azi”. Sipas propagandës së qeverisë, historia e hashashit ka mbaruar. Por, kjo propagandë synon të fshehë aktivitetin e kokave të drogës në një tjetër nivel. Ata po merren vetëm më drogërat e forta, ku fitimi është shumë i lartë. Një pjesë e parave shkojnë për të korruptuar degët e qeverisjes

 

SHBA “nxin” Edi Ramën: Shqipëria e zhytur në korrupsion, burim i pastrimit të parave, trafikut të kokainës dhe heroinës

Korrupsioni zyrtar është i përhapur dhe nxit një mjedis në të cilin trafikantët e drogës janë mjaft të aftë të veprojnë pa u ndëshkuar

Departamenti amerikan i Shtetit i dorëzoi të enjten Kongresit raportin vjetor për strategjinë e luftës ndërkombëtare kundër narkotikëve.

Në pjesën për Shqipërinë, DASH thotë se ky vend është njëkohësisht burim i kanabisit dhe, gjithnjë e më shumë, një vend tranzit për kokainën dhe heroinën.

Në këtë raport që mbulon vitin 2018, Departamenti i Shtetit thotë se tranziti i kanabisit si dhe i drogave të forta komandohet kryesisht nga elementë të krimit të organizuar që transferojnë droga të paligjshme nga vendet burim për në tregjet evropiane.

Vëllimi i konfiskimeve të drogës dhe arrestimet e lidhura me drogën në vitin 2018, thuhet në raport, ishin me rëndësi, të nxitura kryesisht nga bashkëpunimi i organeve ligjzbatuese me partnerët ndërkombëtarë, presioni ndërkombëtar në rritje dhe përpjekjet e Shqipërisë për të hyrë në Bashkimin Europian.

Sipas raportit, roli i Shqipërisë si burim apo treg për droga të paligjshme përtej kanabisit është i vogël, por ka pasur një rritje në konfiskimet e kokainës që kalon nëpër Shqipëri për në Europë, përveç zbulimit të laboratorëve të përpunimit të heroinës dhe kokainës në Shqipërinë veriore dhe qendrore. “Grupet kriminale shqiptare e trafikojnë kokainën dhe heroinën drejt tregjeve evropiane nga vendet burimore në Amerikën e Jugut dhe Azi.”

Në raport thuhet se korrupsioni në të gjitha nivelet e qeverisjes e kufizon efektivitetin e përgjithshëm të luftës kundër narkotikëve.

Korrupsioni zyrtar, thuhet aty, është i përhapur dhe nxit një mjedis në të cilin trafikantët e drogës janë mjaft të aftë të veprojnë pa u ndëshkuar.

Sipas raportit, përpjekjet për të çrrënjosur kanabisin dhe ndjekur penalisht kultivuesit e tij kanë qenë të gjera, por jo kudo njëlloj, dhe ndërhyrja në infrastrukturën e trafikimit të drogës që është krijuar gjatë dy dekadave përbën një sfidë.

Raporti thotë se shkalla e lartë e papunësisë dhe sundimi i dobët i ligjit kanë krijuar një ambient ideal për grupet e krimit të organizuar që shkaktojnë problemin e kontrollit të drogës në Shqipëri.

PASTRIMI I PARAVE

Në pjesën e raportit për pastrimin e parave, Departamenti i Shtetit thotë se gjatë vititt 2018 qeveria e Shqipërisë nuk bëri përparim të rëndësishëm për parandalimin e pastrimit të parave dhe krimeve financiare. Si shkak për këtë, raporti e ve gishtin te korrupsioni, rritja e rrjeteve të krimit të organizuar dhe institucionet e dobëta ligjore dhe qeveritare.

Në raport thuhet se ekonomia e vendit operon në masë të madhe me cash dhe në mënyrë informale, me hyrje të konsiderueshme të parasë nga jashtë në formë të dërgesave të emigrantëve. Krimet që gjenerojnë më shumë para në Shqipëri janë trafikimi i drogës, evazioni fiskal dhe kontrabanda, sipas DASH.

Elementë të tjerë me rëndësi në këtë aspekt, sipas raportit, janë falsifikimi, kontrabanda e armëve dhe trafikimi i qenieve njerëzore.

Shqipëria, thuhet në raport, shërben si bazë operacionesh për grupet e krimit të organizuar që veprojnë në Shtetet e Bashkuara, Evropë, Lindjen e Mesme dhe Amerikën e Jugut.

Reformat e fundit në drejtësi, verifikimi i gjyqtarëve dhe prokurorëve për korrupsion dhe për lidhjet me krimin e organizuar si dhe krijimi i një task-force policore që synon aktivitetet e krimit të organizuar, thuhet në raport, kanë krijuar një trajektore pozitive që Shqipëria të trajtojë çështjen e pastrimit të parave dhe të krimeve financiare.

Megjithatë, përfundon raporti i DASH, korrupsioni i përhapur përbën një sfidë për zgjidhjen e tyre.

Raporti vjetor për strategjinë e luftës ndërkombëtare kundër narkotikëve, i kërkuar nga Kongresi dhe i ndarë në dy vëllime, vlerëson përpjekjet e qeverive të huaja për të reduktuar prodhimin, trafikimin dhe përdorimin ilegal të drogës, si dhe punën e tyre për të luftuar pastrimin e parave që lidhen me trafikimin e drogës.

Raporti nisi të botohej në vitin 1986 dhe publikimi i tanishëm mbulon vitin kalendarik 2018./VOA