Gjekë Gjonaj

Se në Komunën e Ulqinit prodhohet  vaji ekstra virgjër  i ullirit  të cilësisë së lartë  dëshmojnë dy medaljet e arta për cilësi  të cilat  i mori  ullishtari i njohur , Osman Kallaba, nga fshati  Zheji i Anës së Malit   në Manfestimin Ndërkombëtar të Ullishtarëve dhe Prodhuesve të Vajit të Ullirit “Noqnjak 2020”, i cili u mbajt në Zarë të Kroacisë. Konkurrenca ishte shumë e fortë me më se 420 mostra të vajit të ullirit, kryesisht nga rajoni. Më së shumti mostra ulliri kishte nga Kroacia, Slovenia, Mali i Zi dhe Bosnja e Hercegovina. Në këtë manifestim morën pjesë 11 ullishtarë me produktet e veta organike nga Mali i Zi mes të cilëve 7 nga Ulqini, 2 nga Tivari dhe nga një nga Podgorica dhe Sveti Stefani. Të gjithë ullishtarët konkurruan me nga një mostër, të cilat u vlerësuan nga ekspertët ndërkombëtarë.  

Laureati nga Ulqini  i dy  çmimeve më prestigjioze shprehet  se ndjehet shumë i kënaqur dhe i vjen mirë që vaji i tij ekstra virgjër “ Ulqini”  u  vlerësua nga ekspertë ndërkombëtarë dhe se  produkti i tij organik  mori vendin e parë në këtë manifestim. Ullishtari  në zë Kallaba  sivjet  dëshmoi  edhe një herë se vaji i tij i ullirit tashmë radhitet ndër vajet më të njohura   për cilësi në rajon .

Shembulli i këtij ullishtari të licensuar,   73 vjeçar, tregon se prodhimi i vajit të ullirit  në Ulqin ka një traditë të gjatë dhe të pasur. Përveç kësaj ai tregoi se  me sukses po  vazhdon  traditën e ullishtarëve të njohur të kësaj komunë. “ Dy medaljet  të arta nuk janë vetëm të miat, por edhe të ullishtarisë së Ulqinit , nga e cila mora  gjënë më të rëndësishme, e ajo është dashuria për ullirin”, thotë me modesti e sinqeritet Kallaba.  Ai edhe viteve të mëparshme është shpërblyer me çmime të larta e të vlefshme në manifestime ndërkombëtare të ullishtarëve dhe prodhuesve të vajit, mirëpo  kjo është hera e parë që fitoi dy medlaje të arta për  cilësi të vajit të ullirit.

Shpërblimet e sivjetshme    fitojnë  në peshë  për faktin se  Osman Kallaba  ishte ullishtari i vetëm  nga Mali  Zi  i  cili    qytetit të   tij  të lindjes i  solli një dhuratë kaq të madhe, me të cilën duhet të ndjehen krenar të gjithë banorët e tij, dhe jo vetëm.  Me produktin e tij të klasit të parë  ai njëkohësisht po afirmon  edhe Ulqinin edhe Malin e Zi jashtë  kufijëve të tij. Mirëpo është për të ardhur keq  për pakujdesjen dhe mosmbështetjen  e Komunës së  Ulqinit  dhe Ministrisë së  Bujqësisë,  të cilat , siç pohon Kallaba, përveç në fillimet e tij, nuk e kanë përkrahur  financiarisht    asnjeherë tjetër.

Osman Kallaba është  shembull i vërtetë se si një njeri entuziast e punëtor i palodhshëm në moshë të thyer, një emigrant nga Nju-Jorku, përndryshe biznesmen dhe aktivist i  dalluar i çsëhtjes komëbëtare me banim shumëvjeçar në SHBA ,  mund të arrijë majat e suksesit në një profesion të panjohur sa duhet deri para pak vitesh, kur nuk mumngon dëshira e madhe dhe vullneti i lartë.  

Perg. Ndue  BACAJ

Selman  Bajram Ramçaj (Ramçi) është një ndër dëshmorët me moshë të re të Luftës Koplikut 1920, por me moshë të vjetër nga patriotizmi familjar. Familja Ramçaj (Ramçi) nga Gruemirë-Çesma (e Koplik-Grizhes) ku lindi u rritë dhe edukua me vlerat më të mira të atdhedashurisë Selman Bajram Ramçaj(Ramçi), trashigonte  një histori të hershme e të njohur patriotizmi shqiptar. Nga kjo familje e madhe në shqiptari vazhdimisht do të shquheshin trima luftëtarë kundër perandorisë pushtuese shekullore turko-otomane, ku një nga këto beteja luftarake antiotomane do të ishte ajo e 7 gushtit 1871 , të njohur në histori si “lufta te  mullinjët e Vrakës”, luftë që u ndezë kur Stambolli do të rikthente në krye të vilajetit të Shkodrës famkeqin me shpatë në dorë Ismail Pashën.  Në këtë betejë thuhet se kishin rënë edhe mjaftë malësorë-shqiptarë , në mes të cilëve  edhe nga familja Ramçaj (Ramçi). Familja Ramçaj (Ramçi) do të shquhej për atdhedashuri e trimëri edhe në luftrat mbrojtëse kundër shovenëve fqinjë malazez , që synonin ndër mote të zgjeroheshin duke grabitur trojet etnike shqiptare , si me bekimin e Europës plakë dhe pazardhëqet e dobësitë e pushtuesve turq. Luftëtarë të lirisë e mbrojtjes së trojeve shqiptare nga familja Ramçaj (Ramçi) nuk do të mungonin asnjëherë, por ato u bënë më të vrullshme me organizimin e Lidhjes Shqiptare të Prizrenit(1878-1881). Në vitin e stuhishëm 1880 në mbrojtje të trojeve shqiptare të Hotit e Grudës ,  kundër grabitqarëve shoven Malazez do të jepnin jetën duke luftuar te Ura e Rrzhanicës  axhat e Selman Ramçajt (Ramçi) , Zymer Jaho Ramçaj (Ramçi) dhe Maxhun Jaho  Ramçaj (Ramçi). Por trashigimtarët e kësaj dere nuk e lanë me kaq patriotizmin e tyre , por e vijuan në të gjitha luftrat e betejat për t’u dalur zot të drejtave, lirisë, flamurit dhe trojeve shqiptare , si në vitet 1910,  1911, 1912-1913 dhe veçanarisht në Luftën e Koplikut 1920… Në Luftën e Koplikut  Selman Bajram Ramçaj (Ramçi) do të ishte ndër të parët vullnetar (por jo i vetmi nga familja Ramçaj (Ramçi), që do të rrokte armët për të luftuar në mbrojtje të trojeve shqiptare nga pushtuesit serbo-malazez.

Selman Ramçaj (Ramçi) kur do të jepej kushtrimi për mbrojtjen e trojeve shqiptare nga sulmet e ushtrisë serbo-malazeze , ishte pa mbushur 23 vite jetë (i vitlindjes fillimit të vitit 1898), dhe sigurisht që kishte mundësi t’i shmangej kësaj lufte , pasi kushtrimi dhe organizimi për të rrokur pushkët e për t’u dalur zot  trojeve shqiptare të Malësisë Madhe e më gjërë, ishte mbi baza vullnetare . Por Selmani si dhe shokët e tij të atdhetarisë nuk ju shmangën detyrimit të shenjtë të mbrojtjes të trojeve shqiptare. Seleman Ramçaj (Ramçi) rroku armët dhe u rrjeshtua ndër të parët në formacionet vullnetare për mbrojtjen e trojeve shqiptare të sulmuara nga ushtria shovene serbo-malazeze (Jugosllave). Ku këto organizime  vullnetare do të bashkoheshin në formacione ushtarake që do të komandoheshin e drejtoheshin nga të derguarit e Qeverisë Kombëtare Shqiptare (Ahmet Zogu , Bajram Curri etj.), të dalur nga kongresi i Lushnjes (fund-janari) 1920. Selman  Ramçaj (Ramçi) që nga fillimi i kësaj lufte (27 korrik 1920) e deri sa dha jetën në frontin e luftës në Koplik, ishte rrjeshtuar në formacionet vullnetare që komendoheshin nga trimave patriot Deli Meta e Lucë Nishi (deri sa edhe Luca ra dëshmor). Selmani në të gjitha betejat u shqua si një luftëtar trim që nuk i trembej syri nga plumbat e armikut. Pikrisht në një betejë të tillë në rrethinat e Koplikut (Pusat e Mollës) do të binte heroikisht dëshmori Selman  Bajram Ramçaj (Ramçi) . Gjatë kësaj lufte shovenët serbo-malazez ndër të tjera djegin edhe shtepinë familjes Ramçaj (Ramçi). Në vitin 1985 (nga shteti i asaje kohe) Selman Ramçajt (Ramçit) do t’i  jepej titulli Dëshmor i Atdheut, titull që vlenë edhe sot. Në këtë shkrim kujtesë vlenë të cilësohet se Familja Ramçaj (Ramçi) nuk ndeji duarkryq edhe gjatë luftës antifashiste nacional-çlirimtare, ku muaren pjesë me armë në dorë kundër nazifashistëve si luftëtar të lirisë edhe dy vëllezërit e dëshmorit Selman Bajram Ramçaj (Ramçi) trimat , Salo  Bajram  Ramçaj (Ramçi) dhe Adem  Bajram Ramçaj (Ramçi).Gjatë luftës antifashiste do të binte heroikisht trimi Salo Bajram  Ramçaj (Ramçi). Kur në pushtet u instalua komunzmi , në vend që të nderohej e vlersohej kjo familje dhe luftëtari antifashist Adem  Bajram Ramçaj (Ramçi) që shpetoi i gjallë nga plumbat e fashistëve , Ademi arrestohet nga shteti komunist me 20 shtator 1952 me akuzen se ka penguar forcat e sigurimit komunist per kapjen e antikomunisteve e nacionalistëve , dhe me këtë akuzë pasi e mbajnë rreth një vit e gjysëm në hetuesi dhe nuk arrijnë t’a  thejnë , hetuesit kriminel-komunist i marrin jeten me 28 prill 1953. Deri në rrezimin e regjimit komunist nacionalistit Adem Ramçaj (Ramçi) nuk i dihej as vorri. Gjatë viteve të para të pluralizmit e demokracisë, falë një familje të mirë shkodrane Ademit i gjinden vorri , dhe familja Ramçaj (Ramçi) rivarrosin me nderime  eshtrat e trimit nacionalist Adem  Ramçaj (Ramçi). Në vitet e pluralizmit e demokracisë doli nga harresa edhe emri i dëshmorit antifashist Salo Bajram Ramçaj (Ramçi), i rënë në luftën antifashiste me 1943, i harruar për vite qellimisht nga regjimi komunist…

Për këtë familje patriotike thuhet edhe sot se çdo luftë në mbrojtje të trojeve shqiptare i ka “hangër” mashkuj familjes Ramçaj (Ramçi)….

Nderim e lavdi dëshmorit Selman Bajram Ramçaj (Ramçi) dhe bijëve patriot të kësaj familje…

(Voo:Referencë për këtë shkrim-kujtesë mora një portret  të realizuar në shtator të vitit 2005 nga unë në TV-Kopliku dhe “librin” Dëshmorët e Atdheut, Tiranë 2012, fq.152 dhe fq.155,  pregatitur nga Ministria e Mbrojtjse me rastin e 100 vjetorit të pavarësisë së Shqipërisë…Gjithashtu mbiemri i vertet i kësaj familje është Ramçi , por regjimi komunist që nuk u vinte rëndësi mbiemrave, por biografisë  ja shënon mbiemrin nga Ramçi në Ramçaj në të gjitha dekumentet e atij shteti, ndaj unë në kllapa pranë mbiemri të deformuar nga regjimi komunist vendosa mbiemrin e vertet , siç edhe e kanë korigjuar sot trashigimtarët e kësaj familje).

Koplik, shtator  2020

FJALE TE DEHURA  

Mbajnë  subjekte  tingujsh,
Gjysëmfjalësh të thyera,
Çerek fjalësh të dehura,
Me fillim të ëmbël,
Me ngritje toni zemërues,
Për një teke budallaqe,
Për një mospelqim puthje,
E kontradikta ngjit kulmin
Në veshjen e fjalëve me
Brekët e maskave!
Tuj respektu qeverinë e rrenave 
Çmimi i frikes rrit mungesen
E prekjeve,
Rrallimin e frymës,
Në pjestimin e ligësive!

O zot, hiqua maskat
“Dashurive”  me bileta jeshile
Hyrje në parajsen e ndjenjave
Për shitjen e pandershme
Të ndjesive!

02 korrik 2020

DEMOKRACI

Demokraci është të mbjellësh lule
Edhe në kopështin e komshiut,
Nëse pranë tij ke mbjellur!
Demokraci është të ecësh,
edhe kur s’mund të ngrihesh ,  
nëse i ke premtuar dikujt!
Demonraci është
ta ndigjosh tjetrin deri ne fund,
por t’i thuash nëse s’te pëlqen!
Demokraci është ta ndash dhimbjen njëlloj,
edhe pse ty, ndoshta më shumë të dhëmb!

24 qershor 2020

U PRI MENGJESEVE


Për të ecur para diellit,
Unë e pres lindjen me dorë
Në ballë,
Duke filluar kryqin e përditshëm:
“Në emër të Atit e të Birit e të
Shpirtit Shenjtë!”
Nuk ma kujton mengjesi lutjen,
Por unë, për të ardhur mengjesi,
Në sytë e mi dhe të tutë,
Lutem për secilin banor të globit:
“ O Zot , ndihmoi të gjithë njerezit në botë,
 të jetojnë mirë e të jenë të lirë!”
Amin!

27 qershor 2020




SHIU  

Shiu është lidhja ime me qiellin
Pa shkallë, pa asgjë prej gjëje
Një kontakt elektrik me shpejtësi
Rrufeje!
Pastaj, rrufetë zbresin në gjoksin tënd
Ku  marrin vrull të gjithë lumenjtë
E avullojnë, e bëhën e shi
E shkojnë në qiell përsëri!
O zot, u bëfsha shi,
Vetëm për Ty!

29 janar 2019



MENGJES …

M’ka dalë gjumi herët,
Tuj mendu
Mos me m’zanë drita
N’gjumë,
Me ia dhanë
Mëngjesit një kafe,
Qiellit me ia ofru
Një gotë konjak,
Që t’ia hapë
Udhën  diellit
Me i nda retë
Nga fërkimi i natës
Mëngjesi ishte
Ma i shpejtë e m’xuni
Tuj iu afru kafes!

TI JE …


Ti je një zgjim bimor
I natyrshëm
Mengjesi, princi jot
Merr frymë ngeshëm
Tuj kenë le nanët
Para diellit,
Në livadhin pranë
Tuj la sytë
Me vesën e natës
Nga avlli i dashnisë
Së orv’ve të amla
Tuj përcjellë kohën
Njëlloj
Që nga fillimi i botës
Së pagojë!



Histori

Një mal dembel
Shtrinë këmbët në lum
Sipër tij ca sorra
Kanë qerdhet me derë
Nga retë,
Ca zogj që flenë
E vdesin në fluturim,
Kanë kodin e tyne sekret
Tek shkruajnë historinë
E të parëve të vet!



DETI

Deti, si një luan i çmendur
Tund kreshtën e thinjur
Duke rrahur bregun
Me dallgë të hov’shme,
Toka tërhiqej rrëzë bjeshkëve
Si një lindje e parakohëshme
Shkëputja e reve
që marrin formë tufe
Në një fluturim kelektiv
Sikur na bien në shpinë!


PA  T Y

Një stuhi e pafundme
Më vjen në sy, në gjoks, në kry
E kur?
Bash kur jam pa Ty!




DIMER SI KY…

( Kushtuar dimrit kolektiv afro gjyswm shekullor )

Shtëpi të kërrusura
Si ti kishte mbërthyer ngërçi
Çelin portat tuj ndjek retë
Për me hy pak dritë e zbehtë!
Druvarët ngarkojnë mbramjen
Me zjarrin e portokalltë
Tuj thanë me vete:
Dimër si ky, mos ardhtë!



U   N   E


                                                           Une isha, nuk erdha
                                                  Babai erdhi, se para tij qe gjyshi
                                        Para gjyshit qe babai i tij e të tjerë që erdhën
                                     Njëri pas tjetrit , të  vënë  si  ushtarët  në  vij
                                Të larë ngjyrave të ylberta të lumenjëve të artë
                            Tuj puthun ajrin e vaktë të dritës së maleve, ende pa i hapun
                          Sytë, në temperaturen  e fjalëve dhe urimeve. Ku së brendëshmi
                      Pulësonte frymë qiellore, dritë dhe alkimi që vjen përherë tuj u
                   shndërru në portretin tonë, nga hekuri në shkëmb, nga shkëmbi në tokë
                         Nga toka në hi, nga hiri në hiç.  Unë erdha, nuk isha, të njëjtes
                                 rrugë që erdhi Nëna dhe  gjyshja  ime , dy trekëndësha
                                        të mbyllur me dy kulme e me radhë, pas njëra
                                              tjetres, duke u kthyer në drite e diellin në
                                                    kangë , erdhëm njëri pas tjetrit të
                                                         lidhur synit të fillimit tand!
                                                            Gjyshja, mbretnesha
                                                                 E pritjes së lindjeve
                                                                   Ma preu lidhjen
                                                                       Me nanën!     
                                                                              Sot,
                                                                          Piramida ime
                                                                          Ngul me krye
                                                                                  në
                                                                              T O K E!

Nga Marash Gilaj

Duke pasur parasysh se shumë njerëz janë të prirur të marrin një thes me ilaçe për shumë lloje shqetësimi shëndetësor që kanë, do të ishte më mirë të zgjedhin ushqimet që luftojnë , thuajse, çdo sëmundje, duke evituar mbi 90% të ilaçeve të panevojshme, e shpeshherë , më të dëmshme se vetë sëmundjet. Lidhur me këtë, Hipokrati, i njohur si babai i mjeksisë, thoshte: “ Mos i përdorni ilaçet si ushqimin tuaj, por ushqimet e zgjedhura me kujdes, i përdorni si ilaçet tuaja.”

Një në katër çifte të martuar, në botë, mesatarisht, ose 25% e tyre flejnë veç e veç, pasi, sipas mjekësisë, vlera e gjumit rritet me 50 %.

Flini me kokën nga Jugu, pasi kjo shërben për një qarkullim më të mirë të gjakut, na këshillon mjekësia. Zbulimi thotë se fusha magnetike e tokës është në përputhje me këtë pozicion fjetje.

Aftësia e organizmit për t’u mbrojtur nga rreth 6000 sëmundje të ndryshme që na kërcënojnë çdo ditë , është mbresëlënëse dhe me shumë vlera. Kjo ndodh nepërmjet imunitetit dhe atitrupave . Çdokush mund ta kuptojë se shumë shqetësime e dhimbje largohen pa mjekime pas disa orësh ose pas pak ditësh.

Më shumë njerëz vdesin nga vetëvrasjet se sa nga krimi, terrorizmi dhe luftrat të marra sëbashku. Çdo vit, mesatarisht, vetëvriten rreth 788 400 njerëz, në gjithë botën.

Urtësia na mëson se kush abuzon në rini, duke punuar jashtë çdo kriteri e norme, kush pi duhan, alkol apo konsumon drogë etj. , i jep pleqërisë një trup të shkatërruar. A nuk do të ishte më mirë, të ishim më të kujdesshëm që të zgjasim vitet e rinisë dhe të moshes së mesme, duke kaluar pastaj edhe një pleqëri pa shumë probleme? Mendojeni edhe një herë..

12 Shtator 2020

Anëtari i Komisionit të Vlerësimit të kandidatëve të PD për zgjedhjet e 25 prillit, Mark Marku ka folur ekskluzivisht për Report TV, për procesin e zgjedhjes së kandidaturave në Partinë Demokratike, marrëdhënien me ish- kryeministrin Sali Berisha, me kryetarin aktual të PD-së, Lulzim Basha si dhe kritikat për qeverinë e Edi Ramës. 

Profesor ju keni qenë i angazhuar intensivisht për përzgjedhjen e kandidaturave në PD. Si po shkon ky proces?
-Unë jam me parimin që procesi matet nga rezultatet dhe kemi ende ca kohë për të shikuar rezultatet. Ju vetë e thatë që është një proces dhe mendoj që vlera në vetvete është pikërisht vetë procesi. Për herë të parë në historinë e PD-së ndërtohet një proces i tillë, i përzgjedhjes së figurave përfaqësuese, qoftë të listave elektorale, qoftë për deputetë, qoftë për pushtetin lokal. E theksoj edhe një herë vlerën e procesit në kuptimin që është një proces i cili lejon përfshirjen e shumë strukturave që janë vlerësuese dhe korrigjuese në raport me njëra-tjetrën. Në fazën e parë në komisionin e vlerësimit vijnë kandidaturat nga anëtarësia. Kanë ardhur të gjitha kandidaturat nga anëtarësia, rreth 3 600 kandidatura. Kjo në thelb tregon që për herë të parë anëtarësia ka rol në propozimin e kandidaturave, por pa seleksionim të strukturave të partisë lokale. Pastaj kandidaturat vijnë në komisionin e vlerësimit, ne aktualisht jemi në fazën kur kemi bërë një përzgjedhje të nivelit të parë, që do të thotë nga 3 600 kandidatura kemi zbritur diku te 960 kandidatura. Në fazën e dytë kemi edhe kandidaturat e këshillit kombëtar dhe të grupit të deputetëve, rreth 1 000 kandidatura. Në fazën e tretë do të shkojmë te një listë me të gjithë trupën përfaqësuese të kandidatëve qoftë në zgjedhjet lokale, qoftë në zgjedhjet e përgjithshme. Të gjitha këto do t’i shkojnë anëtarësisë duke pasur anëtarësia alternativa përzgjedhjeje.

Pra sërish do të kthehen tek anëtarësia?
-Patjetër, me votimin një anëtar – një votë. Ne mund të zgjedhim rreth 350 kandidatura dhe të gjitha këto i nënshtrohen përsëri një gjykimi të anëtarësisë. Pra, edhe vendimet e komisionit kanë mundësi të korrigjohen. Anëtarësia ka rol të dyfishtë. Pra, zgjedhjet tona vlerësohen nga komisioni dhe pastaj rezultati i shkon kryesisë së partisë dhe strukturave të tjera drejtuese, kuvendit kombëtar etj., sipas statutit të partisë. Pastaj kjo është çështje e PD-së, por edhe aty ka mundësi korrigjimi në kuptimin që strukturat e partisë marrin vendimin e shpërndarjes politike nëpër qarqe të figurave të veta përfaqësuese, të zgjedhura nga komisioni dhe nga anëtarësia. E dyta, ka një kuotë prej 20% që është e kryesisë, e cila mund të bëjë korrigjime të tjera, që do të thotë se mund të shtojë dhe mund të heqë nga listat sepse ne nuk kemi fuqi propozuese. Por 20% e kandidaturave janë të kryesisë, që do të thotë se mund të zgjedhë, duke parë rezultatet e këtij procesi, mund të gjejë pastaj zgjidhje të tipit që mund të shkohet me një listë sa më përfaqësuese në zgjedhje. Pra procesi është unik në vetvete, me disa instanca të cilat nuk mund të ndikojnë te njëra-tjetra, por bëjnë korrigjimin e njëra-tjetrës dhe në thelb është një proces, siç e shkoj unë, edhe demokratik edhe efikas.

A është disi i vonuar si proces? E them këtë sepse i referohem kampit tjetër, qeverisë. Zoti Rama ka përcaktuar koordinatorët, që janë në fushatë praktikisht, drejtuesit e qarqeve. A është disi e vonuar PD-ja në këtë proces?
-Unë mendoj që janë dy filozofi të ndryshme të mënyrës se si mendohet politika. Dhe unë për këtë e vlerësoj procesin ndryshe nuk do të kisha marrë pjesë në këtë proces, se nuk jam pjesë e strukturave të partisë, nuk bëj jetë partie. Mendoj se janë dy forma të ndryshme të mënyrës se si konceptohet jeta politike. Rama vendos për gjithçka, pra ky është modeli i një qeverisjeje, ku kryeministri vendos për gjithçka, qoftë në raport me aktet qeverisëse, qoftë me legjislacionin, qoftë me deputetët etj., etj. ndërkohë që PD-ja me zotin Basha kanë zgjedhur një formë tjetër, pra idenë e përfshirjes dhe të një procesi që në thelb është pak i ngadaltë, por është më i sigurt, më demokratik, më modern, mendoj unë, sepse liderët autokratë që vendosin vetë se kush do të jetë zyrtar edhe një drejtori rajonale, nuk ka funksionuar, ka dështuar.

A mund të ndodhë që ky komision ku ju bëni pjesë, pa e përjashtuar rolin tuaj në të, të rezultojë në fund një komision thjesht për t’u dukur dhe vendimmarrja t’i takojë zotit Basha?
-Hipotetikisht mund të ndodhte, por nuk ka ndodhur deri tani.

Tani jeni ende në proces, e kisha fjalën për në fund.
-Që të jemi të qartë, edhe vetë ne që e kërkojmë fort pavarësinë dhe autonominë, qoftë individualisht, qoftë si komision, jemi të vetëdijshëm që nuk jemi një komision vlerësimi që do të punësojmë punonjësit në administratë, pra po zgjedhim thjesht sipas disa kritereve teknike. Ne jemi një komision, i ftuar nga një parti. Është një proces që në partitë evropiane, si Partia Konservatore angleze, ajo franceze, në të gjitha partitë ekziston një komision i tillë vlerësimi. Ne jemi një komision që marrim disa vendime, përveç se në disa parametra profesionalë por edhe politikë. Procesi është politik sepse është zgjedhja e kandidaturave përfaqësuese në institucionet më të larta politike të vendit, qoftë në pushtetin lokal, qoftë në pushtetin qendror. Kështu që normalisht, është partia ajo që duhet të vendosë. Ne refuzojmë në mënyrë kategorike që të na ndërhyjnë në rolin tonë, por jemi të vetëdijshëm që puna jonë reflektohet në një kontekst politik të partisë. Kjo do të thotë që normalisht, ne nuk i njohim vetes të drejtën që të vendosim për gjithçka, ne vendosim për pjesën e vlerësimit dhe këtë e garantojmë fort, në kuptimin që nuk lejojmë ndërhyrje në procesin tonë të vlerësimit. Pastaj partia politike ka logjikën politike, ka koniunkturat politike, ka objektivat e veta politike në raport me pushtetin, ka jetën e saj të brendshme dinamike politike, ku luhet karriera e secilit dhe në këtë kuptim, patjetër që partia ka rol. Pra, komisioni nuk tenton që të marrë vendime, të cilat i takojnë strukturave politike të partisë, por për aq sa na takon neve, pra vlerësimin e kandidaturave.

Duket sikur ju po bëni një veting politik të kandidaturave.
-Ne bëjmë një vlerësim, jo veting. Kjo do të thotë që ne vlerësojmë se cila do të jetë ajo trupa politike përfaqësuese e PD-së, duke ndërthurur disa elementë. Ambicia ime personale dhe e pjesës tjetër të komisionit është që lista e përfaqësuesve që do të jetë rreth 300-350, sepse nuk po vendosim kufij numerikë se tentojmë të zgjedhim elementët më cilësorë për këtë fazë, pastaj pjesa tjetër normalisht që janë cilësorë por do të jetë pjesë e trupës politike të pushtetit të ardhshëm të PD-së. Në këtë fazë ideja jonë është që ne të çojmë një listë të tillë, e cila të jetë me të gjithë kandidatët seriozë, me integritet, me një karrierë profesionale të konsoliduar. Pra, cilado qoftë zgjedhja e anëtarësisë apo e kryesisë, jashtë kësaj nuk mund të dilet, nuk mund të futen elementë që kanë krijuar probleme të mëdha me përfaqësimin politik qoftë në parlament, qoftë në pushtetin lokal deri tani. Dhe këtu ne qëndrojmë shumë fort. Ideja është që asnjë kandidat, i cili nuk duhet të jetë, të mos kalojë. Në mes të kandidatëve normalisht ne të zgjedhim atë që mendojmë ne, sepse jemi komision dhe jo peshorja e padiskutueshme etj., etj. Ne jemi të bindur se kandidaturat që seleksionohen janë më të mirët në mes të më të mirëve.

Zoti Basha e mori vendimin për ngritjen e këtij komisioni sepse zhgënjeu me listën e kandidatëve të PD-së në zgjedhjet e kaluara, pasi një pjesë e atyre që janë sot në parlament janë realisht një zhgënjim.
-Pa diskutim që ai ka qenë një proces i diskutueshëm. Edhe unë mendoj që është edhe kjo një arsye që ka ndikuar. Por kjo është një gjë e mirë. Faktin që zoti Basha ka reflektuar për këtë proces, por edhe vetë PD-ja, unë e shikoj si diçka shumë pozitive. Jo pozitive është të mendosh që gjithçka e bën mirë sidomos në çështjet e pushtetit ku luhen fatet e shoqërisë dhe të 2,8 milionë shqiptarëve që jetojnë këtu. Le të themi që është një reflektim, por unë e shikoj si diçka shumë pozitive dhe si shenjë të mirë të pushtetit të ardhshëm në momentin kur PD-ja të vijë në pushtet. Ka liderë që i mendojnë vendimet e tyre si të padiskutueshme, si zgjidhje të fundit, siç u thotë zoti Rama shqiptarëve çdo ditë, që është më i miri prej të gjithëve, që është zgjidhja më e mirë. Ky është një banalitet se në momentin që ti shpall vetveten si më të mirin, je delirant, nuk respekton asnjë tjetër. Janë të tjerët që duhet të të thonë se je më i miri dhe në rastin e votës ta thonë qytetarët.

Edhe zotit Rama ia ka thënë vota e qytetarëve në vitin 2017 kur fitoi zgjedhjet.
-Në vitin 2017 nuk kemi pasur zgjedhje. Nëse ti mendon se je më i miri, pastaj bën të gjitha ato lëvizje që ky perceptim të shprehet në votë. Në votë nuk shprehet sepse nuk ke rezultuar më i miri në jetën e njerëzve, sepse ke shkatërruar ekonominë, ke kanabizuar vendin.

Po pse i fitoi zgjedhjet?
-Sepse i manipuloi. Nëse ti vërtet je më i miri, atëherë nuk ke nevojë që t’i manipulosh zgjedhjet, nuk ke nevojë të bësh aleancë me krimin e organizuar, nuk ke nevojë të mbjellësh Shqipërinë me kanabis. Po të jesh më i miri të votojnë duke mbjellë fasule, patate etj.

A ka fakte opozita që procesi i zgjedhjeve u manipulua?
-Ka përgjime, ne e dinim atë, por është tjetër çfarë dihet dhe tjetër çfarë vërtetohet. Ndonjëherë ka raste, siç thonë italianët il delitto perfetto, pra mund të bësh krim dhe askush nuk e merr vesh. Krimet e pushtetit shpeshherë nuk zbulohen sepse zhduken gjurmët, aq më tepër kur ke të gjithë sistemin në dispozicion. Por krimet e qeverisjes, edhe në qoftë se nuk vërtetohen juridikisht, janë të vërtetueshme në sytë e qytetarëve. A kanë ikur 300 mijë shqiptarë nga Shqipëria, kryesisht të rinj? Po.

Kryeministri Rama thotë që kanë ikur për një mundësi më të mirë.
-Po, por pse nuk ikin po kaq nga Lituania? Sepse natyrisht që i kanë mundësitë më të mira. Japonia është një vend më i zhvilluar se Lituania, SHBA-të, Kanadaja janë shtete më të zhvilluara se Lituania. Lituania është një vend me 4 milionë banorë, ka dalë nga një sistem rrënues komunist siç ishte ai i Bashkimit Sovjetik, është një vend i vogël pa burime. Ne kemi shumë më tepër burime se Lituania, se Letonia, se Estonia dhe se vende të tjera të cilat kanë ecur. Pse kanë ecur? Sepse kanë pasur qeverisje të mirë.

Për të pasur një qeverisje të mirë duhet të kesh edhe një opozitë të mirë që kritikon fort dhe e bën betejën aty ku duhet, në parlament.
-Unë mendoj që një nga pasojat shkatërruese të pushtetit Rama, është që tenton të shkatërrojë opozitën politike, duke e acaruar, duke mos i krijuar hapësira etj., etj., opozitën mediatike, opozitën e shoqërisë civile. Të gjitha organizatat e shoqërisë civile kompromentohen, mediet blihen, opozita sulmohet si të ishte grup armiqësor në sistem diktatorial dhe normalisht, fakti që ti nuk do opozitë është një nga pasojat e keqqeverisjes së zotit Rama. Edhe ajo që thotë ai që nuk ka opozitë, nuk është argument.

Presidenti i Republikës ka dekretuar datën e zgjedhjeve për zgjedhjet parlamentare. Ju përmendët se komisioni juaj bën përzgjedhjen e kandidatëve edhe për pushtetin lokal. Cila është lidhja? PD-ja synon që më 25 prill të shkojë paralelisht edhe në zgjedhje lokale edhe pse nuk ka dekret për këtë?
-Një nga kriteret e vendosura nga BE-ja për zhvillimin e takimit për hapjen e negociatave, jo kritere për hapjen e negociatave, është që të gjykohet procesi i manipulimit të votave përmes përgjimeve, si edhe procesi i zgjedhjeve lokale. Normalisht që Shqipëria të avancojë në objektivat drejt BE-së, duhet që të përmbushë këto kritere. Gjëja më e mirë do të ishte që fillimisht të verifikohet ligjshmëria e zgjedhjeve nga strukturat përkatëse kur të krijohet Gjykata Kushtetuese dhe në momentin që jepet vendimi atëherë do të vendoset dhe PD-ja po përgatitet edhe për këtë proces.

Pra, po i paraprin mbajtjes së zgjedhjeve lokale vitin e ardhshëm?
-Po. Besoj se për këtë arsye po zgjidhen edhe kandidatët për pushtetin lokal. Por gjëja që mua më pëlqen në këtë proces është se të gjithë ata që janë paraqitur si kandidatura nuk kualifikohen për pjesën e parë të listës përfaqësuese, por janë një kontigjent, i cili do t’i shërbejë strukturave të PD-së për pushtetin e ardhshëm, d.m.th. për pushtetin lokal etj., etj. Kjo është pozitive sepse kemi një database të verifikuar të kandidatëve për qeverisje, sipas disa parametrave.

Ju thoni se si pjesëtar i këtij komisioni jeni i pavarur nga strukturat e PD-së dhe nga zoti Basha. Por dihet që ju jeni i pozicionuar politikisht te PD-ja. Ju u rikthyet, por si është marrëdhënia juaj me zotin Basha dhe me zotin Berisha?
-Unë jam i pozicionuar politikisht në çdo moment dhe nuk e kam atë kompleksin që e kanë shumë persona këtu në Shqipëri, që janë të pozicionuar politikisht dhe nuk e pranojnë. Aristoteli e ka quajtur njeriun “kafshë politike”. Pra nëse nuk reagon politikisht, nuk je qytetar. Pjesëmarrja ime në atë komision është konfirmim që unë nuk jam rikthyer, nuk kam qenë asnjëherë në strukturat e PD-së, kam qenë politikisht i djathtë për shkak të bindjeve të mia, por edhe për shkak të faktit që kam qenë student kur u krijua PD-ja. Për mua PD-ja është partia me të cilën kam një lidhje të hershme, pavarësisht se nuk kam qenë asnjëherë në strukturat e saj. Nuk është rikthim sepse e kam deklaruar me kohë që nuk kam asnjë ambicie, as për të qenë deputet, as në ndonjë pozicion të ardhshëm në pushtet. Pse? Sepse ndihem mirë kështu, siç jam. Mua në vetvete pushteti nuk më thotë kushedi se çfarë. Kam pasur një eksperiencë dhe nuk jam ndier mirë në atë lloj pozicioni. Kam shprehur qëndrimet e mia që dihen publikisht. Nuk jam natyrë që i ndërtoj marrëdhëniet mbi bazën e keqkuptimeve, siç ishte ai rasti i pjesëmarrjes sime si deputet. Kështu që e kam zgjidhur me kohë atë histori. Pra nuk jam kthyer as në kuptimin e aktivitetit të mirëfilltë politik të tipit partiak, as në politikën e mirëfilltë të çfarëdolloj institucioni politik të vendit. Kam marrë pjesë në komision sepse më është dukur një proces shumë interesant, që përputhet me disa ide, të cilat i kam hedhur me kohë për riformatimin e partive politike shqiptare, edhe të PD-së. Ideja ime është që përherë dikush duhet të reagojë. Marrëdhënia ime me zotin Basha është miqësore, për aq sa mund të kesh miqësi me një politikan, sepse duhen ndarë miqësitë. Distancën që duhet unë e mbaj vetë dhe këtë e kam me të gjithë, jo vetëm me politikën. Unë e vlerësoj zotin Basha për disa gjëra. Në gjykimin tim ai është një model i ri lideri. Ne jemi mësuar me modelet e liderëve postkomunistë, autokratë. Mendoj se zoti Basha është një profil tjetër, është më i hapur, më pak agresiv në komunikim, ka një diskurs të moderuar që i bën mirë shoqërisë shqiptare që ka shumë probleme si historike ashtu edhe të aktualitetit. Si natyrë zoti Basha krijon më tepër mundësi për bashkëpunim. Më vjen mirë që janë shtuar edhe kritikat ndaj zotit Basha. Kam frikë se në momentin kur të vijë në pushtet do të pakësohen kritikat dhe kritikët do të bëhen lavdërues të Bashës, ndoshta me tepricë. Këtë frikë kam, jo atë të kritikave. Unë kam qenë deputet i PD-së, kur zoti Berisha ishte kryeministër. Nuk kam pasur ndonjë problem thelbësor me Berishën. Problemi ishte mënyra se si ai e konceptonte marrëdhënien me deputetët, me partinë dhe me të tjerët. Kjo mua nuk më ka pëlqyer kurrë, aq më tepër kur flitej për veten time. Njeriu është egoist dhe kur thotë që nuk është i tillë është hipokrit. Pra, unë dua më shumë veten se partinë, se Berishën, se Bashën. Marrëdhënia ishte e tillë që unë nuk pranoja të sillesha si deputetët e tjerë në PD, që nuk duhej të flisnin, të ishin konformistë, të mos reagonin në raport me problemet që krijoheshin gjatë qeverisjes etj. Partia ka rregulla, por asnjë rregull nuk duhet të shkelë të drejtat dhe liritë bazë të njeriut, përfshi dhe deputetin. Mendoni që deputeti të mos ketë të drejtën e fjalës, po qytetari si mund ta ketë? Pra unë flisja, votën nuk e kam tjetërsuar dhe kam ndjekur bindjet e mia. Sot marrëdhënia është normale sepse unë nuk i ndërtoj marrëdhëniet mbi bazën e inateve ndaj të tjerëve. Vlerësimi im për Berishën është ai që ka qenë, e vlerësoj pozitivisht për të gjitha gjërat pozitive që ka bërë për Shqipërinë dhe për PD-në, hyrja në NATO, liberalizimi i vizave, qeverisja e mirë ekonomike sidomos në mandantin 2005-2009, infrastruktura etj. Është një njeri që punon. Unë Berishës nuk i kam pranuar kurrë pushtetin absolut. Më rezulton se Berisha ka pasur një pushtet më demokratik po ta krahasoj me Ramën. Unë pothuajse i njoh të gjithë politikanët shqiptarë dhe mendoj se Berisha ishte njeriu që i dëgjonte më mirë të tjerët. Tjetër gjë është që bënte atë çfarë donte vetë, duke bërë llogaritë e veta të pushtetit. Por, në thelb ishte një dëgjues shumë i mirë, d.m.th. një ide pozitive për pushtetin e tij e merrte. Tjetër gjë pastaj që vendimet i merrte në mënyrë autokratike. Duhet ta ndajmë këtë.B.K./Shqiptarja.com