Alegri sheh një Milan të madh: “Pato-Ibra-Dinjo, më të fortët”

Milano (Itali)- “Nëse treshja sulmuese Pato-Ibrahimoviç-Ronaldinjo është më e forta në Europë? Mendoj se po”. Është kjo përgjigja e trajnerit të Milanit, Masimiliano Alegri, në konferencë për shtyp në Milanelo, në prag të debutimit në kampionat në San Siro kundër Leçes. “Për më tepër kemi Borrielon, Inzagin dhe Huntelar. Bëhet fjalë për gjashtë sulmues të një niveli botëror që kompletojnë njëri-tjeterin”, është shprehur Alegri (gjithsesi ndonjë nga sulmuesit duhet të largohet), që fillon të mendojë për lojën e sulmuesit suedez që duhet të firmosë kontratën sot. Edhe se pastaj logjikisht ka shtuar: “Tashmë duhet të përqendrohemi dhe të mendojmë vetëm për ndeshjen me Leçen për ta nisur në këtë mënyrë me këmbën e duhur sezonin e ri”.

Duke menduar për Leçen

Trajneri pastaj kërkon të dërgojë diskutimin në tema më afër kampionatit: “Nëse Ibrahimoviç do të mbërrijë do të jemi shumë të lumtur. Lojtarët dhe unë, ndërkohë, duhet të mendojmë për ndeshjen e ditës së dielë, që është edhe gjëja më e rëndësishme. Mbase do të festojnë mbërritjen e Zlatan me një fitore. Gjithsesi edhe pa të Milani ka një grup të aftë për të luftuar deri në fund për titullin kampion. Suedezi do të kompletonte një repart me karakteristika fizike dhe teknike që të gjithë trajnerët do të dëshironin ta kishin”. Por trajneri Alegri kërkon konfirmime në fushën e lojës: “Leçe është një skuadër e pasur me entuziazëm, sapo kanë arritur të kthehen në Serinë A dhe do të kërkojë sigurisht të nxjerrë në pah cilësitë më të mira, sepse luan në debutim përballë një kundërshtari kalibri siç është Milani. Nga ana jonë kemi stimujt e duhur për të filluar me fitore kampionatin, sepse në të kundërt do të gjenim vështirësi të mëdha”.

Pato është

“Skuadra në këtë periudhë përgatitjesh ka punuar shumë mirë. Kam gjetur disponibilitet të madh nga ana e lojtarëve, që kërkojnë të punojnë shumë dhe janë teknikisht shumë mirë. Duhet të përmirësojmë akoma më shumë kondicionin fizik, por gjëja më e rëndësishme do të jetë të fitojmë, sepse nuk kemi fituar akoma një ndeshje”. Alegri është shprehur edhe për gjendjen e lojtarëve të veçantë, duke filluar nga braziliani Pato që është rikuperuar: “Është mirë, kështu që duhet të jetë në këtë ndeshje. Kundër Leçes do të jenë të gjithë disponibël me përjashtim të Flaminis dhe Odos. Inzagi? Është një lojtar i rëndësishëm dhe pavarësisht nga cilësitë e tija, ka gjithmonë entuziazmin e një djali të ri dhe për këtë arsye është një shembull i mirë për të rinjtë që kur vijnë në fushë duhet ta jetojnë futbollin në mënyrën më oportune”. Në fund, lëshon sfidën, pikërisht ashtu siç i pëlqen dhe tifozëve kuqezi: “Interi është skuadra favorite me detyrim, sepse ka fituar katër trofe dhe është e drejtë të jetë kështu, por çdo vit është i ndryshëm. Janë shumë komponentë që ndikojnë për të fituar ose për të humbur. Zikaltërit mbeten skuadra favorite, por skuadra të pathyeshme në futboll nuk ka”, ka përfunduar komentin e tij Masimiliano Alegri.

Balak mbetet jashtë Gjermanisë

Trajneri Johakim Lëv ka vendosur të mos grumbullojë lojtarin. “Kemi vendosur bashkarisht”. Ish-kapiteni i kombëtares së Gjermanisë, Mikael Balak, ka mbetur jashtë skuadrës kombëtare gjermane për dy ndeshjet eliminatore të Euro 2012, që di të zhvillohen në muajin shtator, siç shikohet në listën e bërë publike nga trajneri i Gjermanisë, Johakim Lëv. Mikael Balak, që është kthyer në Bundesligë tek Bajer Leverkuseni, ku ka luajtur dhe më parë përpara transferimit tek Chelsi, ka disa muaj që është i dëmtuar dhe ka nevojë për kohë në mënyrë që të gjejë gjendjen më të mirë fizike pas dëmtimit që pësoi në kavilje, dëmtim, i cili e mbajti Balak jashtë Botërorit. “Kemi diskutuar me qetësi dhe gjatë për shumë gjëra me Balakun”, është shprehur Lëv. “Mikaeli është në rrugën e rekuperimit, pasi ka qëndruar tre muaj larg fushave të lojës dhe të gjithë jemi të kënaqur nga ky fakt. Tani ai duhet të gjejë formën e tij më të mirë me Leverkusenin dhe më pas dyert e skuadrës kombëtare janë të hapura për të”. Lëv ka grumbulluar 17 lojtarë që ishin në Botërorin afrikanojugor nga 21 lojtarët që do të jenë përballë Belgjikës në Bruksel më 3 shtator dhe kundër Azerbajxhanit në Këln, katër ditë më pas. Mikael Balak u dëmtua në fundin e sezonit të shkuar në finalen e Kupës së Anglisë, ku luante për Chelsin. Pasi qëndroi jashtë botërorit të Afrikës së Jugut, ai u kthye në Bundesligë me Leverkusenin. Mesfushori organizator 33-vjeçar, i cili ka zhvilluar 98 ndeshje me kombëtaren gjermane, është aktivizuar 90 minuta në fitoren 2-0 kundër Borusias së Dortmundit në javën e parë në kampionat. Me Balakun jashtë skuadrës, Lëv ka më shumë kohë për t’u menduar për lojtarin që do të mbajë shiritin e kapitenit. Filip Lahm e mori këtë rol në Botëror dhe është shprehur se, dëshiron ta mbajë përsëri shiritin e kapitenit. Balak nga ana e tij ishte shprehur se shiriti i kapitenit i takonte vetëm atij. Johakim Lëv ka grumbulluar mbrojtësin Heiko Vesterman dhe mesfushorin Kristian Tresh si dhe portierin Rene Adler, të cilët u dëmtuan para botërorit. “Rene është kthyer, ka vazhduar Lëv komentin e tij. Pas operacionit ka treguar se është në formë të mirë”. Të dëmtuarit Arne Fridrih, Zherom Boateng, Piotr Trokovski dhe Denis Aogo, të cilët kanë qenë pjesë e kombëtares gjermane në Botëror, nuk janë grumbulluar.

Inter, Diego Forlan përgjigja ndaj Zlatan Ibrahimoviç

Milano (Itali)- Humbja kundër Atletiko Madridit dhe mbërritja e mundshme e Zlatan Ibrahimoviç tek Milani, janë duke bindur presidentin zikaltër Masimo Morati, të kthehet në merkato për ti dhuruar tifozëve të tij një goditje të madhe në merkato. Identikiti të dërgon tek Diego Forlan, që prej shumë kohësh është një lojtar që preferohet nga presidenti Morati dhe ka një karakteristikë më shumë: mund të luajë pa asnjë problem dhe në Champions Ligë. Sulmuesi uruguajan ka shprehur fjalë vlerësuese pas finales së zhvilluar në Montekarlo: “Interi është një klub prestigjioz, nëse do të më thërrisnin do të shkoja me shumë kënaqësi”. Masimo Morati nuk e ka fshehur asnjëherë admirimin total ndaj Topit të Artë në Botërorin Afrikë e Jugut 2010, duke u shprehur disa herë dhe publikisht se është i gatshëm të bëj një çmenduri për sulmuesin bjond uruguajan. Mbërritja gjithmonë e me më shumë mundësi e Ibrahimoviç tek Milani mund të ndikojë në këtë mënyrë pozitivisht, sepse do ti jepte presidentit zikaltër dhe shtytjen e fundit emocionale që do ta çonte të kryente një sforco ekonomike. Humbja kundër Atletikos ka dhënë ndonjë sinjal të vogël se ka nevojë për përforcime dhe ka bindur Moratin që, pasi ka humbur Mario Balotelin, në sulmin e Interit mungon një sulmues i besueshëm që ti japë mundësi të rriten me qetësi talentet e mëdha si Koutinjo dhe Biabiani. Deklaratat e dashurisë, ndërkohë nuk janë vetëm me sens unik. Po vetë uruguajani Diego Forlan pas ndeshjes në Superkupën e Europës i ka dërguar një mesazh të rëndësishëm Interit, duke u kandiduar si goditja e mundshme e fundit të merkatos verore:

Zaneti i qetë: “Do të ndodhte një humbje”

702 ndeshje zyrtare me fanellën zikaltër dhe nuk ka pasur mundësi ti festojë. Javier Zaneti është i zhgënjyer pas humbjes 2-0 të pësuar nga Atletiko Madridit në finalen e Superkupës europiane të zhvilluar në Montekarlo, por si kapiten i mirë nuk mund të bëj gjë tjetër veçse të shikojë me optimizëm për impenjimin e ardhshëm. Në mikrofonat e ‘Rai’, flamuri zikaltër ka folur për ndeshjen e humbur dhe për të ardhmen, që sigurisht do të jetë gjithmonë me të njëjtën fanellë: “Herët a vonë do të ndodhte një humbje. Atletiko ka luajtur më mirë sesa ne; është e qartë që nuk mund të jesh në 100% të formës në këtë periudhë. Nuk kërkojmë justifikime, moduli ri nuk ka të bëjë aspak me këtë që ndodhi. Tashmë, me kokën lart, të mendojmë për kampionatin që për ne fillon të hënën. E ardhmja? Jam i lumtur mbi të gjitha që kam mundësi të kthehem të vesh dhe njëherë fanellën e Argjentinës, pastaj nëse gjithçka do të shkojë mirë do të vazhdojë me skuadrën zikaltër deri në moshën 40-vjeçare…”.

Ndërkohë, tek Interi pritet të vijë Diego Forlan “Zikaltërit janë një klub prestigjioz, nëse do të mbërrinte një ofertë do ta analizoja dhe me shumë mundësi do të shkoja”, është shprehur Forlan. I vetmi problem gjithsesi qëndron tek kostoja e lartë e kartonit me Atletiko Madridin që nuk ka ndërmend të pranojë një shkëmbim teknik në këtë operacion. Ideja që krijohet tashmë është që gjithsesi një sulmues tek Interi do të mbërrijë. Pasi kanë humbur Kajt, nëse nuk do të jetë Forlan goditja, atëherë Morati do të shkojë në Xhenova për të marrë italianin Xhiusepe Skuli, që mbetet një zgjidhje rezervë.

Përgatiti

Andi VERÇANI